Ny versjon av SafeSeaNet og integrasjon med Digitoll

Integrasjonen gjer det mogleg for næringslivet å oppfylle melde- og opplysningsplikta samstundes som myndigheitene får raskare og meir påliteleg tilgang til naudsynte data.

Kva er nytt?

Den nye versjonen av SSNN inneber at:

• Opplysningar som tidlegare kunne lastast opp som filer (til dømes PDF‑manifest) i SSNN, i ny SSNN må sendast inn i eit fast, maskinelt lesbart format.
• Opplysningar som blir sende inn, blir kontrollerte med ein gong. Tolletaten gir rask tilbakemelding dersom noko er feil eller manglar. Dette gir betre kvalitet på innsende data.
• Når kvaliteten på opplysningane blir betre, treng Tolletaten sjeldnare be om meir dokumentasjon i etterkant.

Løysingar i overgangsperioden fram til 15. september

Etter lanseringa av ny versjon av SafeSeaNet, vil det vere ein overgangsperiode der næringslivet kan velje mellom fleire løysingar. Overgangsperioden varer fram til 15. september.

I denne perioden kan desse tre alternativa brukast:

1. Gammal SSNN-løysing: støttar ikkje Digitoll.
2. Ny SSNN-løysing: med integrasjon mot Digitoll.
3. Tolletaten sitt API: støttar Digitoll, men proviant- og besetningsdeklarasjon må leverast i gammal SSNN.

Løysingar etter overgangsperioden

Frå og med 15. september vil det ikkje vere mogleg å bruke gammal SSNN for å oppfylle digital melde- og opplysningsplikt mot Tolletaten i samband med grensekryssande vareførsel. Det vil då ikkje lengre vere mogleg å sende inn ustrukturerte data (til dømes PDF-manifest).

Frå dette tidspunktet vil det vere krav om:

• overføring av strukturerte data (data i format som kan lesast maskinelt) om fartøy og last til Tolletaten sine system
• at fartøy blir handsama likt som andre transportmiddel
• at det blir vist til prosedyreval i melding om sendinga

Etter 15. september vil næringslivet kunne bruke ei av desse løysingane for å oppfylle pliktene til Tolletaten for fartøy på sjø:

1. Tolletaten sitt melde- og opplysnings-API for sjø- tilgjengeleg frå 2025
2. Kystverket si nye løysing for SafeSeaNet Norway (nye SSNN)

Det er både før og etter overgangsperioden mogleg for aktørane å kombinere dei to løysingane, og sende inn ulike delar kvar for seg. Alle meldingar må likevel vere sende inn og kopla saman før grensepassering.

Kva må du gjere no?

• Set deg inn i kva løysing som passar best for di verksemd.
• Sørg for at systema dine kan sende strukturerte data.
• Planlegg overgang til ny løysing i god tid før 15. september.

Les meir om korleis dette skal fungere på våre nettsider: Digitoll for sjø.

Følg også med i Tolletaten sitt nyheitsbrev.