Beslagstrenden held fram – går mot nytt rekordår i hasjbeslag

– Smuglingstrykket er høgt, smuglarmetodane endrar seg raskt og blir stadig meir avanserte, åtvarar tolldirektør Benedicte Bjørnland.

Over 1 tonn beslaglagt

Sidan byrjinga av 2025 har Tolletaten gjort store hasjbeslag samanlikna med dei føregåande åra.

I fjor beslagla Tolletaten over 2,2 tonn hasj, som var eit rekordår. Så langt i år er det beslaglagt over 1,2 tonn.

Dersom det held fram slik, ligg Tolletaten an til å beslaglegge like mykje som, eller meir, i 2026 enn det som vart beslaglagt i fjor.

– Tolletaten er førstelinja i innsatsen mot innførsel av narkotika. Beslaga er eit resultat av målretta innsats av våre tilsette, i kombinasjon med gode verktøy, etterretning og godt samarbeid med andre myndigheiter nasjonalt og internasjonalt. Mengdene beslaglagt er betydelege og viser kor viktig det er å stanse dei ulovlege varene på grensa, før dei får moglegheit til å bli distribuert vidare i landet, seier Bjørnland.

Dei store hasjbeslaga blir ofte gjort i vogntog og varebilar.

– I tillegg beslaglegg vi også ein god del hasj- og marihuana i post- og kurerstraumen, primært frå USA.

Rekordbeslag av narkotiske piller

Dei siste åra har Tolletaten også gjort svært mange store beslag av narkotiske piller av kategoritypen benzodiazepiner, og 2026 var heller ikkje noko unntak. Den totale beslagsmengda så langt i 2026 er på over 1 million piller, og allereie nesten på nivå med 2025, som vart eit rekordår.

– Vi ser at benzodiazepiner blir beslaglagt i store mengder i nesten alle trafikkstraumar. Både etterspørselen og tilgjengelegheita i Noreg er høg, og den ulovlege verksemda er godt organisert. Her ser vi også at aktørar samarbeider om smuglinga inn til Norden, forklarer Bjørnland.

Benzodiazepiner er ei samlenemning på legemiddel som blant anna verkar mot krampeanfall, angst og søvnvanskar. I Tolletaten sin beslagsstatistikk er det særleg legemidla Ksalol (alprazolam), Benzedin (diazepam) og Rivotril (klonazepam) som utpeikar seg.

– Det er ein stor marknad i Noreg for benzodiazepiner som er smugla inn i landet, og bruken er tett kopla til forbruk av annan narkotika. Inntak av benzodiazepiner kan vere svært helseskadeleg, spesielt i kombinasjon med andre rusmiddel, slik som opioid, åtvarar ho.

Utfordrande trusselbilde

Tolletaten har også beslaglagt 95 kg kokain det første halvåret av 2026.

Til samanlikning vart det beslaglagt 278 kg kokain i 2025, der eit beslag på 147 kg hos ein fruktgrossist prega statistikken. Tidlegare år har Tolletaten også avdekka fleire store kokainparti som kjem med fartøy til Noreg.

– Så langt i år er det ikkje gjort nokon beslag av denne storleiken, noko også statistikken reflekterer, seier Bjørnland.

I første halvdel av 2026, som ved andre år, blir dei fleste beslaga gjort på landeveg på grensa mot Sverige, enten i personbil eller vogntog.

– Vi vurderer framleis kokaintrusselen som høg. Smuglinga til Europa blir stadig meir variert, både når det gjeld transportmåtar, smuglingsruter og metodar for å skjule kokainet. Det gjer trusselbildet komplekst og utfordrande for Tolletaten. Derfor jobbar vi meir målretta enn nokon gong for å avdekke og stanse smuglinga, forklarer ho.

Etaten har i dag eit tett samarbeid med både politiet, Kystverket og andre myndigheiter i Noreg. I tillegg pågår det eit omfattande etterretningssamarbeid på tvers av land.

– Vi har jobba med å vidareutvikle etterretningsarbeidet vårt, og vi ser også at andre europeiske land gjer det same. Dette er eit viktig bidrag til å stanse kokainflyten til Noreg og Europa. Vi utvekslar dagleg informasjon med europeiske politi- og tollmyndigheiter, og vi blir stadig meir etterretningsdrivne i kontrollane våre.

Går mot nytt rekordår i beslag av vapes

Tolletaten sin beslagsstatistikk viser òg at det blir forsøkt å smugle inn store mengder med e-sigarettar og væske til e-sigarettar. Berre e-sigarettar utan nikotin og med tobakkssmak er lovlege produkt i Noreg, noko som gir etterspørsel etter smugla e-sigarettar med nikotin og smak.

I 2025 vart det gjort over 4200 beslag tilsvarande om lag 565 000 stk. e-sigarettar (gitt at kvar e-sigarett består av 2mL e-væske med ein nikotinstyrke på 20mg/ml.). Så langt i år har etaten gjort nærmare 2000 beslag tilsvarande om lag 420 000 stk. e-sigarettar.*

Om ein tar utgangspunkt i nikotininnhaldet i e-sigarettane som er beslaglagt så langt i år, tilsvarar dette like mykje nikotin som i om lag 5,6 millionar tradisjonelle sigarettar.

– Det er med andre ord svært store mengder vi har avdekka, og vi går mot det som truleg blir eit nytt rekordår, forklarer Bjørnland.

Tolletaten har avdekka både mindre beslag meint for privatbruk – og større beslag meint for vidaresal.

– Dei største beslaga verkar godt organisert. Dei kriminelle er drivne av profitt, og smugla e-sigarettar kan seljast med høg forteneste på den norske marknaden.

Så langt i år er det gjort flest beslag i post- og kurerforsendingar, særleg frå Nederland, Storbritannia og Sverige. Det er likevel også gjort enkelte store beslag på landeveg.

Ein del av dei som står bak smuglingsforsøka Tolletaten har avdekka, er svært unge.

– Utviklinga er bekymringsfull. E-sigarettar med nikotin kan i seg sjølve utgjere ein helserisiko ifølgje Helsedirektoratet, men når du kjøper dei ulovleg, veit du aldri kva produktet faktisk inneheld. Vi er også bekymra for at fleire av personane som smuglar og sel dette, er mindreårige som blir utnytta av kyniske bakmenn, seier tolldirektøren.

Fleire bestiller «skjønnheitsfremmande» legemiddel ulovleg

Tolletaten har også sett ein stor auke i antal personar som bestiller ulovlege peptider på nett. Det er særleg peptider brukt med formål om å bygge musklar, gå ned i vekt og bli brunare som utgjer størstedelen av beslaga.

– Alle legemiddel bestilt frå utlandet på nett av privatpersonar, er ulovlege å innføre og inneber stor risiko. Du veit ikkje kva du får, om vara er trygg, eller under kva forhold vara er produsert, åtvarar Bjørnland.

Berre så langt i år har Tolletaten gjort nærmare 900 beslag, samanlikna med rundt 1000 beslag i 2025 og 600 i 2024.

– Utviklinga gjenspeglar nok både trendar og etterspørsel i samfunnet, i kombinasjon med at vi i Tolletaten treff på kontrollane våre. Vi ser alt frå små mengder som kan tyde på personleg bruk, til større kvanta som kan indikere vidaresal. Blant mottakarane finn vi både kvinner og menn i alle aldersgrupper, seier ho.

* Merk at beslag av vape i Tolletaten blir både ført i kg, liter og stk. Det vil derfor kunne førekome nokre avvik i talmaterialet i forbindelse med konverteringa frå kg og liter til stk.