Innsending av ankomstmelding - før grensepassering og/eller etter lossing

Autoriserte mottakarar må melde ifrå før lossing

Autoriserte mottakarar må melde frå til

bestemmelsestollstaden

om at varene har kome. Varene kan ikkje lossast før bestemmelsestollstaden har gitt løyve til å losse.

Ankomstmelding skal ikkje sendast inn før grensepassering

Tolletaten har funne fleire tilfelle der autoriserte mottakarar har registrert ankomst i NCTS før varene har passert grensa.

Dette gjer at grensepasseringa ikkje kan registrerast i NCTS ved transitteringstollstaden. Det fører til forseinkingar for transportøren og ekstra arbeid for Tolletaten på grensa. Kvar enkelt sak må avklarast før transporten kan halde fram.

Det kan også vere eit teikn på mogleg svindel, sidan det kan finnast fleire forsendingar med same MRN.

IE007 er ei ankomstmelding som skal sendast når transporten har kome fram til den autoriserte mottakaren, og før varene blir lossa. Autoriserte mottakarar må ha rutinar som sikrar at transporten faktisk har kome fram til bestemmelsestollstaden før ankomst blir registrert.

Konsekvensar når ankomstmelding blir sendt inn før grensepassering

Tolletaten vil halde tilbake forsendinga til situasjonen er avklart med den autoriserte mottakaren og/eller bestemmelsestollstaden. Så lenge varene ikkje har gått over til fri disponering, har ikkje den hovudansvarlege for prosedyren løyve til å transportere varene til bestemmelsestollstaden i Noreg. Då kan ikkje denne transporten halde fram under transitteringsprosedyren.

Det er ikkje lov å starte ei ny transittering eller forpassing frå grensa til bestemmelsestollstaden i Noreg for same forsending. Du kan ikkje ha to transitteringar med kvar sin MRN for dei same varene.

Forsendinga må i staden deklarerast for overgang til fri disponering ved innpasseringstollstaden der varene er lagt fram. Då blir varene frigitt på grensa og kan leverast til mottakar.

Eit alternativ er å deklarere varene for prosedyren tollager.

Ankomstmelding skal sendast før varene blir lossa

Tolletaten har også sett at autoriserte mottakarar sender ankomstmelding (IE007) etter at varene er lossa, i mange tilfelle fleire dagar etter at dei faktisk kom fram.

Dette gjer at bestemmelsestollstaden ikkje får vite at varene har kome fram, og dermed ikkje får anledning til å gjennomføre kontroll. Når ankomst blir meldt fleire dagar etterpå, påverkar det også fristen som avgangstollstaden har sett, og gjer at garantien blir bunden opp unødig lenge.

Lossemerknader

Dersom ankomstmelding (IE007) er sendt før grensepassering, må den autoriserte mottakaren deklarere varene på grensa, enten til prosedyren overgang til fri disponering eller til prosedyren tollager.

Lossemerknad (IE044) skal sendast til bestemmelsestollstaden. Merknadene må samsvare med det som faktisk har kome fram, og ført under ein prosedyre.

Åtvaring og sanksjon

Dersom den autoriserte mottakaren ikkje klarer å sende ankomstmelding (IE007) i tide, vil Tolletaten vurdere om verksemda framleis kan ha status som autorisert mottakar.

Dersom den autoriserte mottakaren ikkje følger retningslinjene som er gitt då transitteringa vart stoppa, og feila held fram, vil Tolletaten gi ei formell åtvaring. Åtvaringa vil forklare kva som er feil, kvifor reaksjonen blir gitt, og kva sanksjonar som kan bli aktuelle dersom brot på retningslinjene held fram.

Vi minner om at Tolletaten kan endre, trekke tilbake eller stanse autorisasjonar dersom det skjer alvorlege eller gjentatte brot på vilkåra for autorisasjonen.