Handle frå ein VOEC-registrert nettbutikk

Kva er VOEC?

VOEC

er ei ordning for utanlandske nettbutikkar som sel varer til privatpersonar i Noreg.

Nettbutikkar som er registrert i VOEC, bereknar og krev inn meirverdiavgift på same måte som ein norsk nettbutikk. Du betaler derfor avgiftene direkte til nettbutikken saman med prisen for vara og eventuell frakt.

For deg som kunde betyr dette at:

• du ser totalprisen du betaler
• du slepp å betale meirverdiavgift ved innførsel
• du unngår gebyr frå transportør
• pakken kan kome raskare fram fordi transportør ikkje treng å deklarere vara for deg

Varer som blir kjøpte gjennom VOEC-ordninga er også fritatt frå tollavgift.

Kva varer blir omfatta av VOEC-ordninga?

VOEC-ordninga gjeld for varer med ein verdi under 3000 kroner.

Du kan kjøpe fleire varer og få dei sendt i same pakke. Kvar vare må likevel ha ein verdi under 3000 kroner, og varene må vere til privat bruk. 

Ordninga gjeld for dei fleste varer, med unntak av:

• næringsmiddel, for eksempel mat, drikke, kosttilskot, vitamin
• varer med restriksjonar, for eksempel legemiddel, våpen, alkohol, tobakk
• varer med særavgifter, for eksempel sukkerhaldige varer, drikkevareemballasje, smørjeoljar og kvitevarer som inneheld klimagassar.

For desse varene må du betale importavgifter ved innførsel, uavhengig av verdien på sendinga. Du må også betale eit gebyr til transportøren, for eksempel Posten.

Varer med avgiftsfritak, som aviser, magasin og bøker, er inkludert i VOEC-ordninga.